خشم باب زنك :-
قاعده تعاين في الحفلة زي بتاع المباحث الرايح ليهو متهم تفتش عن عريس تطلع بيهو من الحفلة دي .. الطويل الاخدراني.. ولا القصير الاسمراني لكن دا شكلو مبهدل .. أما الأول أبو جلابية وعمة وطاقية ومفتاح عربية بقت بتاوق دايرة تشوف في في يدو دبلة ولا لا .. بشَّر للعريس ولقتها مافيشة.. كويس طيب بس شكلو كبيروعندو صلعة، لكن أنا صغيرة يعني ؟ همست في صمت ما مشكلة لو داير يدبل برضي بيهو بس اتخارج من الورطه دي .. أرسلت عدد من البسمات .. والخجل نزل عليها زي المطرة ختت عيونا المخططة زي كراس الحساب في الواطة وكمية من البُدرة تعمل ليها رغيفة.. عاملة خجلانة بعد ما غمز لها ..إنت من زمن البغمزو ،بالغت عديل بس دا زولي ذاتوو.. تذكرت نسوان الحلة الاكلو لحما وجِنهَّم شمارات ..كل بنات جيرانم وأهلها عندهم تلاتة وأربعة وليدات وهي الآن تلاتين وكمان أتنين .. قضت عمرها في القراية أصبحت بايركس بمرتبة الشرف الاولي .. أنبهلت وأنبرشت والوش ضرب لون فيهو حفر اكتر من شوارع الخرطوم حتي الجلد بقا تقيل ما شغالة بي شي المغصة البتكتل إنها كانت زمان مفرهدة وتعجب ومطلوبة والعرسان كُتار وهي تتشرط وتنظر ساي عاملة فيها البت سمحة.. دا شين ..ودا مفلس.. ودا عندو صلعة ..ودا سمين ..واسع البعقد وبسوقا بي هدوما ما لقتو حالة صعبة وهي تهز في رأسها.. فرص ماافي مع بنات التسعينات ديل من باب الجامعة لي بيت راجلا (أســكيني وميــني وتــني) .. !!
زمن مافي دا لو تمت الجامعة اصلا..بي مغسة وحساده منها بس (بطلقوهم ... بطلقوهم) لأنهم شفع ساي ما بتحملو المسئولية البنات ديل .. (ما الشجر الكبار فيهو الصمغ) .. بس تاني عاينت لي حالا المايل وسكتت والدمعه تشق الخد جري لي تحت..ياخوانا ..عليكم الله بت زي كدا ماجستير وما بتعرف الشتير دا ما وضع خطير؟وما دايرة أي شي غير راجل ان شاءالله بي عراقي.. إلبسو من أخواني بس أجي.. تذكرت عرسان الفيس بوك بعد ما ختيت صورتي المشت ليها الأستوديو مخصوص ظبتطها ولمعتها جابت لي عرسان من السعودية والأمارات ولندن والمانيا والابيض وشندي..بس بمجرد ما يجو النسوان البيت و يشوفني برفعو الحاجب فوق مستوى الدهشة وتسمعهم تحت تحت وووب علينا يا الكبروس لا.لا.لا دا المجروس لا دا اللوري الهوستن وووب عليَّ دي من زمن ( دق الشلوفة والفدو والمفحضة ) بقبلو بي وشهم والشبكة تقع مع العريس مسح وحظر طوالي ريحتو في الفيس بوك تاني مافي..
أي بت تسمع بها عرسوها بتكرها وبتقطع علاقتي بيها نهائي ، كرهت أي كلمة بتبدا بي حرف العاء.. رفعت رأسها لقت مره واقفة جنب الأخدر الطويل دهب كيف وحنة كيف توب عجيب وشافع في الايد وأشارت لها إشارة (كية ليك وكية ليك) صحبتك طوالي شالت قزازة البيبسي وفلقتها ودورت الشكلة ..
خشم باب سُنط : -
قاعد بشيل في شعرات الشيب من الشنب بعد ما صبغ الرأس الفاضل فيهم كم صوفة بعد ما أستعد لي ملاقات حبيبه الفيس بوك حيلآقيها أخيرا اتشبب شديد قطعيه وقميص مخنصر زي اولاد الزمن دا وبنطلون جنز بلو وباتا قماش واحلي ريحه وشكه من أمها ..كوي الهدوم مرتين وبغني (اليلة لاقيته و ملأ السرور قلبي وبي إسمو ناديتو)،بت أختو الصغيرة مركزة معاهو شديد ضحكت ومشت لي امها خالو الليلة شكلو عندو كتله،حيلاقي عروسه جديدة ولا شنو؟ أمها قالت ليها هوي دا ما بعرس لو كان بعرس كان بتو تكون قدرك بحب في البنات الصغار ديل وحبو ونسات ساي قايل روحو بقرا في الثانوي كرهنا وشارط عينا ياخي دا حَب الحلة كلها وبنات اهلنا والمعارف وبنات الجامعات ونسابتنا لم كملو بقا يلقط من طرف وسيد الرايحة بقا افتح الفيس بوك عارفة ناس الحلة سموهو (الأخصائي) في الجكس والحب ..ياخي قلبو دا تقول باجرو مفروش كل أسبوع فيهو بت مرة ودانا لي وحدة قبل كدا طلعت عاهة وتاني واحدة عندها نفسيات رسمي بعد خلاها دخلوها التجاني الماحي بس الغريبة البنات بحبو عشان عامل زي (الزين) مبروك بركة الوحدة تخلي بي جاي يعرسوها تاني يوم بي جاي تقول شغال صبي مأذون اخرتا بقا بكتب شعر .ضحكت هي وبتها لدرجة القرقره .. جاء ماشي سكتو (صنوُ) وهو ما حاسي بي شي يغني ساي (حبيبي أهـ وقلبي تاه في يوم الزيارة) ،واصلو في الضحك قالت ليها اتيمنت يا بتي يوم عرسو اضبح عجل كرامة وسلامه اصلو اخوي ما فكاك البورة وضحكو لمن الدموع جرت في خدودم ..
الاخصائي طلع الشارع أول ركشة ِركبه وماشي علي الكافتريا نزل وضرب ليها تلفون وصفت ليهو محل قاعدة مشا ما لقاها عرف دي تقله منها..المهم قعد في الكافتيريا شوية ولع ليهو سجارة وطلب ليهو عصير وبقا بشرب بعد شوية جات بت خاشة .. صحبك تقول كشحو فيهو جردل موية نفس الوان هدوم حبيبتوالمتفقين عليها، اتخلع شديد زولك بقا قاعد علي اعصابو .. تتبسم ساي وجات قعدت سبحان الله طلعت سارقة صورة من بت تانيه.. لقاها شينة شنة خرافية .. سمينة لدرجة انو نفسها بتشيلو بي القوة عاتية وعندها عضلات وشنب وفحمه بس وفيها صوت خشن وقصييره شديد وابتسمت مرقت صفوف سنون اكتر من الطبيعي وعندها أنياب كمان ..شعرها واقف ليف ازيك يا حبيبي. و لمن قعدت صحبك فندرب قام طوالي ما استحمل قال ليها أنتي واحدة كضابة انا علاقتي معاك لحدي هنا أنتهت وقبل ما اتم كلامو لقي يد في رقبتو اتنين خمستاشر في تسعة عضلات تبش نفس شبة حبيبتو ورفعو ليك من الواطة والاخصائي بقا يفرفر زي الجريو في يد الملاكم دقو ليك دق لمن بقا بكورك يا ابو مرووه حصلوني ودوني القسم حبيبتو الماكنه دقت السكلي ووب علي سجمي اخواني !..
قالو لي يا تعرسة يا بنكتلك ..وقبلو عليها وانتي يا ... تااح..توو .. وادوها ميه كف وعشرين شلوت وهي زي شوال البصل الحبة ما بتجيها.. براحة الأخصائي انسحب بزحف بي الواطة وهوب قام جاري ..جري خلعة اسرع من كاكي خلها بدوقو فيها ولا عاين وراهو تاني وقام فللي أقرب ركشة وكب الزوغة.. قام مخلوع هزتو بت اختو بسم الله ياخالو الواطة اصبحت مالك نايم في الكمبيوتر..
خشم باب حلة :-
الباير والبايره ديل عالمهم غريب خلاص وتصرفاتم اغرب البت البايرة لو حست انك ما جادي طوالي بتديك ضهرا ولو ما مشيت بيتكم خطبتها تاني ما بترد لي تلفون ولا بتشوف وشا والولد الباير كرهتو البنات البحبو القورش الكتيره وجاي لي ابوي متين ؟ تلقي الواحد فيهم تجاوز الاربعين وبفتش في بنات عمرها تاشر سنة ما عارف السر شنو؟ والاغرب في بنات برضو بيهم لانو بكون واعي جدا احتك في الحياة اكتر من منتخبنا واندية قمتنا عندو قريشات أكيد إنو في العمر دا بكون الحولينو كلهم استقرو وما دايرين منو شي..
أما الموضة التانية إنو العروس عندها شقة وعربية وبيتا جاهز من المعلقة لي العربية يعني (كمبليت) دايرة ليها عريس بس تكمل بيهو الديكور وممكن تصرف عليهو كمان لو كان عاطل وكتير منهم بعرسو اولاد اصغر منهم بي سنين لإنو الشاب ما بكون عندو حق زينة البيت خلي العربية .. اتاكد لي تماما انو الحاجة ام الاختراع والأغرب والأدهى انو الوحدة فيهم ممكن تكون زوجة تانية وتالتة ورابعة... بس لازم تعرس والسلام ..ضل راجل ولا كلام النسوان ..البت البايره اكتر سؤال بتكرهو (ما في عريس .. ما قربتي .. يا بت انتي كبرتي .. راجية شنو لو ليها يد تشيل الكلمات دي من القاموس اما الرجل الباير فممكن أعرس مطلقة .راجلة ميت . عندها عشرة شفع المهم اعرس والسلام وكرهتو اقول ليهو فلان عرس ولا فلانة كان خاتي عينو عليها عرسوها يازول ما لقيت ليك عروس .. يا زول عرس جيب ليك عيال يشيلو كبرك ..راجي شنو .. اما المجتمع بقا اغرب من البايرين والبايرات كلو منشغل بي تفاصيل حياة الناس دي عرسوها دي طلقوها يعني بقا مافي شغلة لي الناس غير الناس ما كلين لحمهم وحتي الرجال فاتو النسوان بقو بتاعين قطيعة درجة اولي بهمتمو بي المظاهر الواحد تلقي ما عندو شغلة غير فلان سوَّى وفلان اشترى وفلانة ما عارف شنو يا جماعة الناس توعى شوية تنتبة لي شغلهم و حياتم الخاصة تبعد من سيرة الناس والمظاهر الخداعة تخلي همها شخصي وعام يحلو مشاكلهم اأول ونظرتم أعمق في الحياة تخطط لي نفسها واشغلو روحهم بتطوير الذات ومن اشتغل بالناس مات غم وفقر ساي وليس همًا...
خشم باب حديد:-
الآن الزواج أصبح مشكلة كبيرة للشباب في مختلف الفئات العمرية هاجس الأسر والبيوت فالنساء يطلبن الكثير من التفاصيل التي تتسرب أليهم عبر القنوات الفضائية مجموعة من المطالب الثانوية لزواج لا يقدر عليها الشخص العادي الدخل وليس لديها من الوقت لانتظاره لأن العنوسة شبح يطارد الفتيات أكثر من الرجال في مجتمع ذكوري التفكير لكن العنوسة وجهان لعملة واحدة رجال كان او نساء وكل الزيجات الان تبشر بمزيد من التعقيد والانتظار وأصبحت المظاهر البزخية في الزواج تفوق تكاليفها المائة مليون بالقديم كمية من العادات الجديدة علي موروثاتنا حتى القديمة منها مثل (فطور العريس والجرتق) أصبحت قيمته تفوق زواج كامل لأحد البسطاء في بلادي.. الشباب محبط جدا كل الآمال والحبيبات تتسرب من بين أياديهم يتزوجن من مغترب او احد أثرياء هذا الزمان..
حتى أن المشوار الطويل نحو الزواج يحتاج الي سنوات من الصبر والتجهيز والعمل الدائم الغير منقطع لأشياء لا يستفيد منها احد الطرفين لإرضاء المجتمع والسلامة من همسهم الخبيث.. دار نقاش بيني وبين بنت من أسرة متوسطة الحال كانت مؤمنة بانها (ما حتعرس لا اعلي مستوي في البلد قلت ليها لو جاك زول عادي بتعرسي؟ قالت لي (أنا اهم شي عندي طلباتي العايزاها لو نقصت شئ ما دايرة اعرس)،قلت ليها (إنتي عادية جدا يعني المميز فيك اخلي ليهو زول اخسر 100 مليون شنو)؟ قالت لي (أنا بقيِّم في نفسي والعايز مرحب والما عايز في ستين داهية)، طبعًا أنا احتقرت جدا طريقة تفكيرا وعرست بي الطريقة الأسطورية دي بس بعد اقل من سنة كانت طلقوها والسبب عجيب عشان ما غيَّر لها دهبا اتخيلو .. في أحدى الجلسات سمعا قصة لشاب بهتم بي تفاصيل العرس لدرجة الجنون خاطب لأكتر من خمسة سنين وفر قروش أي شي حتي غسيل العدة أي شي محسوب ورقة وقلم عرس بتفاصيل برجوازية جدا انتهي العرس وهو يهم بالسفر في المطار قبضو كاتب شيكات بدل شهر العسل شهرين سجن .لابد للأمهات والآباء إرشاد الشباب انهم اتزوجو بي أبسط شي وإنو العنوسة دي أخطر أمراض العصر ..
الآن وكل الشباب أصبح ما جادي وبخاف من الخطوة دي ، بس ليس جبن منهم بس خوف من عدم القدرة المالية لمراسم الزواج في بلادي أتمني انو الأسر تقلل المهور .. تساعد الأبناء ..تسهل التفاصيل وتبسط مراسم الزواج.. تقيف معاهم بكل ما تملك عشان الحياة تستمر وأكون عندنا أجيال جاية تحمل السمات السودانية والشباب أحلامهم تصبح حقيقة.. وننعم بي مجتمع خالي من الشروخ الاجتماعية والأطفال مجهولي الابوين ومرض الآيدز.. والعرس بالفاتحة يا ناس ما حلال ...؟؟؟
خشم باب آخير-:
حدد ملامح دخلتك
ارسم تفاصيل رؤيتك
من بين طشاشك وفكرتك
احساسك انت و دهشتك
ارسل أشارة بسمتك
افتح مسارب بهجتك
خليني اخشك في شهيق
واطلع حنين في زفرتك
--------------------------
وتمتد الرؤيا بعد الرؤيا إلى الأبد..
بقلم الجزار
ڪيفمآ أڪۈن لآ يشبـهـني آلأخرۈن .... ليس كل ما أكتبه تعبير عن شعوري أو احساسي.......و ليس كل ما أرويه يعبر عن نفسي بشكل خاص....انما هي كلمات قد يحتاجها كثير من الناس
المشاركات
0 التعليقات:
إرسال تعليق